जनकल्याणको स्वास्थ्य शिविरमा ५५० को परिक्षण

२८ फागुन, हेटौँडा । हेटौँडा–६ चौघडामा भएको निःशुल्क स्वास्थ्य शिविरमा ५ सय ५० जनाको स्वास्थ्य परिक्षण गरिएको छ । जनकल्याण बचत तथा ऋण सहकारी संस्था लिमिटेडको बार्षिक कार्यक्रम अनुसार निःशुल्क स्वास्थ्य शिविर आयोजना भएको हो ।
शिविरमा हाडजोर्नीका १ सय ४२, छाति तथा मुटुका १ सय ७, आँखाका १ सय ९७ र १ सय ४ जनाको रगत परिक्षण गरिएको प्राविधिक सहयोगी आयु पोलिक्लिनिकका संचालक उत्सव चौलागाईले बताए । शिविरमा डाक्टरहरु अरविन्द शाह, दिपेश पटेल, रश्मी विर, परमार्थ बस्नेत, प्रविण पाठक र मनिता उप्रेतिले स्वास्थ्य परिक्षण गरेका थिए । शिविरमा क्वेष्ट फर्मास्युटिकल बीरगंजले करिव १ लाख रुपैँया बराबरको औषधी निःशुल्क वितरण गरेको थियो ।
संस्थाका अध्यक्ष हिमाल पौडेलको अध्यक्षतामा भएको शिविर शुभारम्भ कार्यक्रममा उपाध्यक्ष नारायणप्रसाद अधिकारी, सचिव रोमबहादुर न्यौपाने, सल्लाहकार बद्रीबहादुर पाठक लगायतले मन्तव्य व्यक्त गरेका थिए ।