जिल्ला प्रहरी कार्यालय मकवानपुरको आयोजना नागरिक सुनुवाई

हेटौंडा,२३ फागुन
 समाजमा नागरिकसँगको सम्बन्ध विस्तार गर्दै समुदायसँग सुमधुर सम्बन्ध स्थापित गर्न प्रहरीले प्रयास गरिरहेको आज हेटौंडामा आयोजित कार्यक्रममा बताइएको छ । जिल्ला प्रहरी कार्यालय मकवानपुरले आयोजना गरेको नागरिक सुनुवाई कार्यक्रममा जिल्लाका प्रहरी प्रमुख एसपी बसन्तकुमार लामाले प्रहरीको तर्फबाट नागरिकसँगको सम्बन्ध विस्तारमा पहल भइरहेको स्पष्ट पार्नुभयो । नागरिककै हितलाई ध्यानमा राखेर प्रहरीले सेवा दिइरहेको भएपनि नागरिक र प्रहरीबीचको दुरी देखिएको सन्दर्भमा नागरिकसँग समन्वय र सम्बन्ध विस्तारका लागि प्रहरी मेरो साथी अभियान, मुस्कानसहितको सेवा लगायतका कार्यक्रम सञ्चालन भएको एसपी लामाले बताउनुभयो ।

साथै, उहाँले नागरिक सुनुवाई पनि प्रहरीको नागरिकसँग निकट सम्बन्ध स्थापित गर्ने एउटा माध्यम भएको बताउनुभयो । प्रहरीले विगत ३ महिनामा सञ्चालन गरेका काम, उपलब्धी र चुनौतीबारे जानकारी दिँदै नागरिकका गुनासा तथा प्रतिक्रिया भए टिप्पणीका रुपमा लिई सुधार गर्नका लागि कार्यक्रम सञ्चालन गरिएको एसपी लामाले बताउनुभयो । सो अवसरमा एसपी लामाले ३ महिनामा भएका कार्य सम्पादन विवरण, अनुसन्धानका क्रममा भएका नियन्त्रण, अपराधमा कारबाही, फरार अपराधी पक्राउ, लागु औषधका कारबाही, ट्राफिक कारबाही, अवैध सुन पक्राउ जस्ता कामको विवरण प्रस्तुत गर्नुभयो । कार्यक्रममा नागरिक समाज, विभिन्न संघ संस्था र राजनीतिक पार्टी, सामुदायिक प्रहरी, सर्वसाधारण लगायतले जिज्ञासा राखेका थिए । एसपी बसन्तकुमार लामाको प्रमुख उपस्थितिमा सञ्चालन भएको कार्यक्रममा वक्ताहरुले सडकमा सवारी चाप, लागु औषध प्रयोगकर्ता, लाइसेन्स जाँच, प्रहरीको व्यवहार जस्ता विषयमा केन्द्रित भई जिज्ञासा तथा सुझाव दिएका थिए